المهندس احمد يونس: نداء الى أهالينا الشرفاء في مدينة صور

نداء الى أهالينا الشرفاء في مدينة صور♥

أهل صور يلي بلشت معكن المظاهرات بطريقة عفوية لما نزلنا بالليل وتاني يوم بدون ما حدا يتصل بحدا وكنا كبار و صغار و صبايا و شباب واطفال ومسنين عم نرفض سوا عيشة الذل والهوان والتلوث ورفض الضرائب ونطالب بتحسين المعيشة انتو الحقيقة وكان شكلكم بكبر القلب عم تمشوا بشوارع صور والبوصلة تبعتكم كانت إيصال الصوت انو تعبنا وقرفنا، وينكن هلأ نحنا كلنا بحاجة إلكن ما تتخلو عنا لأنو مطالبكم هي مطلبنا، ما بدنا نكسر، ما بدنا نولع دواليب، ما بدنا نزفر لسان بدنا حياة كريمة لأهلنا واولادنا بدنا الكل يسمعوا همومنا بدنا حكومة تعرف انو ما بقا فينا نكمل حياتنا وسط الفقر والبطالة والغلا والتلوث والديون والخوف من بكرا والرعب من المستقبل، شبعنا فساد و هدر و سرقة ونهب بدنا نستعيد كل شي نسرق من احلامنا واعمارنا واولادنا واحفادنا، اشتقنا لنظافة الكف و لنزاهة المسؤول ولاستقامة السياسي وقرفنا المحسوبيات والوسايط والتبعية والمحاصصة.. خلينا كلنا سوا ننزل نقول شو بدنا بكل عفوية دون تدخل اي سياسي او حزب مهما علا شأنه او صغر شأنه، ما بدنا ننشر فتن بدنا نبث حب ومحبة وأخوة ونوحد جهودنا لنرسل رسالة لكل المسؤولين بدون اي استثناء وبدون أي خلفيات انو نحنا شعب يستحق العيش بكرامة في بلدنا يلي دفعنا من أجله الدم والشهدا حفاظا على كرامته وكرامتنا والكرامة لا تتجزأ، متل ما منحفظ كرامتنا لما منقاوم عدونا كذلك لازم نقاوم الظلم والقهر في بلدنا من أجل الكرامة وعزة النفس. لذلك بدعي أهل صور لتشكيل لجنة أهالي مدينة صور هي وحدها تشرف ع كل تحركات التظاهر كي يكون الصوت أعلى وأشمل ويمثل نبض صور الخال من الخلفيات والانتماءات الحزبية والسياسية ونحنا ولادكن منمشي معكن والى جنبكم.
(احمد يونس)

#لجنة أهالي مدينة صور- أصبحت الآن- ضرورة – لإيصال نبض صور