الحملة الوطنية لإنقاذ مرج بسري تُعلِنه “محمية طبيعية” وتثبّت لوحة بذلك على مدخل المرج

بيان صادر عن الحملة الوطنية لإنقاذ مرج بسري
٢٦ ايار ٢٠١٩

“تزامناً مع زيارة وزير الخارجية جبران باسيل إلى منطقة جزين وإطلاقه مواقف داعمة لسد بسري، نظمت الحملة الوطنية للحفاظ على مرج بسري تظاهرة انطلقت من جسر بسري إلى مدخل المرج حيث تم إعلان مرج بسري محمية وجرى تثبيت لوحة على مدخل المرج كتب عليها “محمية مرج بسري ترحب بكم”.
حضر إلى جانب الحركة البيئية اللبنانية النائب الدكتور أسامة سعد وأهالي صيدا وقرى الشوف وجزين وممثلون عن الأحزاب والهيئات المعارضة للسد وتمت تلاوة البيان التالي:
جينا اليوم لنفتتح محمية مرج بسري الطبيعية. هيدا المرج اللي أساسا محمي بالخطة الشاملة لترتيب الأراضي اللبنانية اللي أقرها مجلس الوزراء سنة ال٢٠٠٩ يعني قبل خطة السدود بال٢٠١٢.
نحنا مش جايين نتحدا حدا، إنما جايين نطبق المرسوم اللي بيصنف مرج بسري منتزه طبيعي إقليمي.
عم بيقولو إنو الدولة استملكت معظم الأراضي بالمرج، كثير منيح! هيدا يعني إنو تحويل مرج بسري لمحمية طبيعية صار ممكن وأسهل إنو يتحقق لأنو هوي ملك للشعب اللبناني كلو.
نحنا مش جايين نتحدى حدا، نحنا عم نحمي ١٥ ضيعة بالشوف وجزين من التهجير، عم نحمي بيروت وجبل لبنان من إنو يشربو مي مسرطنة من القرعون، نحنا عم نحمي ٦ مليون متر مربع من أحراج الصنوبر والسنديان وبساتين الليمون والزيتون والأراضي الزراعية على أنواعها.
محمية مرج بسري بتحتوي على أكثر من ٥٠ موقع أثري من ضمنن معبد روماني وكنايس وأديرة وجسور أثرية ونواويس ودروب تاريخية وغيرها من الآثار الشاهدة على تاريخ هذه المنطقة العظيمي.
لأول مرة بتاريخ لبنان، نحنا الشعب عم نعلن إنشاء محمية طبيعية لإلنا وللأجيال اللي جايي.
مبروك لأهالي مرج بسري، مبروك للبنان!
محمية مرج بسري ترحب بكم.”