ناشطة تنقذ نورس لم يكن يستطيع الطيران من الموت على شاطئ صور: “اخدتو عالبيت واهتميت فيه…بزمن الكورونا الله بعت هالنورس ومعه رسالة حب وفرح وبهالوقت لازم ما نتردد بالمساعدة”!

قبل أربع أيام اتصل فيني (س. خ) شرطي من بلدية صور وقلي انه عالشط في نورس ما عم يقدر يطير ولا يمشي كان الوقت صار متأخر وما بقدر اضهر بسبب منع التجول طلبت منه يتركه جنب المحمية، ليلتا كتار من الناشطين والناس اتصلوا فيني لنساعده بس ما كان في إمكانية اوصل لعنده لتاني يوم الصبح نزلت وراح معي الياس شرطي بلدي دايما بيساعدني بمتل هالحالات..
اول ما وصلنا صارت الناس تخبرنا انه في نورس بده مساعدة ويسألونا اذا جايين كرماله وكمان خبرونا انه في سلحفاة بحرية ميتة بالمنطقة ، انا والياس كفينا لعند النورس وبالفعل كان وضعه كتير صعب وما بيتحرك تفقدته وما لقيت اثر لجروح فيه.
حطيته بالقفص وكفيت طريقي لقينا السلحفاة دفناها لانه ما ما كان في إمكانية لتشريحها واخدت النورس ع بيتي لاهتم فيه وقدمله المساعدة اللازمة..
كنت كتير خايفة ما يتحسن وضعه بس الحمدلله من تاني يوم بلش ياكل ويجرب يوقف ع اجريه ويرجع يقعد بمحله
اليوم الخبر احلى والنورس قدر يوقف وعم يجرب يطير وقريبا جدا بس يصير جاهز رح رجعه عالبحر مطرح ما لقيناه
بدي اتشكر كل حدا اتصل فيني وطلب مني نساعده وبدي قول انه بزمن الكورونا الله بعت هالنورس ومعه رسالة حب وفرح، اليوم انا وولادي مبسوطين لانه عم يتحسن وناطرين يرجع يطير لنفلته وبتمنى بهالوقت تحديدا انه نلتفت كلنا لنحمي طبيعتنا طالما قادرين نكون ايد للخير ما نتردد بالمساعدة لانسان او حيوان ما بتفرق..
شكرا لكل اللي حكوني من جديد وساعدوني لاهتم بهالطير
Suzanne Daou
Ghina Nahfawi Baltahji
Lebanese Wildlife
Fouad Itani
Ibrahim Sfdn
وانشالله ما كون نسيت حدا
وبخص بالشكر كمان Rami Amin اللي عرفت مؤخرا انه انتشله من البحر بعد ما لاحظ انه ما عم يتحرك وحطه عالشط ولولاه يمكن كان غرق وما عرفنا فيه.
الصور للنورس لما استلمته والفيديو كيف صار اليوم